98.
1324. (Pozsony.) 9. Dec. – Carolus I. rex, transscribit et sigillo novo roborat, donationem et venditionem possessionis Ablincs, capitulo Poson. factam.
Karolus, Dei gracia Hungarie, Dalmatie, Croacie, Rame, Seruie, Gallicie, Lodomerie, Cumanie, Bulgarieque rex, princeps Sallernitanus et Honoris, ac montis sancti Angeli dominus. Omnibus Christi fidelibus, tam presentibus, quam futuris, presencium noticiam habituris, salutem in omnium Salvatore. Cum a nobis petitur, quod iustum et honestum est, decet regiam excellenciam facilem prebere consensum, in hys presertim, que videntur sanctarum Dei ecclesiarum commodis convenire. Proinde ad universorum noticiam harum serie volumus pervenire: quod discreti viri, capitulum ecclesie Posoniensis, fideles nostri, ad nostram accedentes presenciam, exhibuerunt nobis quoddam privilegium Merhardi (sic!) quondam iudicis, iuratorum et universorum civium civitatis Posoniensis, super donacione et vendicione cuiusdam terre, Ablench vocate, per Petrum dictum Sartor, dominam Margaretam, filiam Woch, uxorem ipsius Petri, nec non dominam Annam filiam eiusdem, neptem scilicet dicti Woch, Johannem filium Laurencii, filii dicti Petri, ac Mykaelem filium dicte domine Anne, facta ecclesie S. Salvatoris de Posonio, seu preposito et capitulo eiusdem ecclesie confectum, supplicantes nobis humiliter, ut ipsum privilegium, seu huiusmodi donacionem et vendicionem dicte terre, ratam habere et nostro dignaremur privilegio confirmare.[55] Cuius tenor talis est:
Sequitur nr. 56. sup. ex ipso origin. exhib.
Nos siquidem, qui ex debito susscepti regiminis nostri, sanctam matrem ecclesiam in suis iuribus conservare debemus, attendentes peticionem dicti Capituli iustam fore et racioni consonam, inspecta dicti privilegii civitatis Posoniensis veritate, id privilegium non abrasum, non cancellatum, nec in aliqua sui parte viciatum, de verbo ad verbum presentibus insertum, ymmo prescriptam donacionem et vendicionem dicte terre, eidem ecclesie et capitulo, ac preposito eiusdem factam, approbamus, acceptamus, ratificamus et presentis scripti patrocinio perpetuo confirmamus, sine preiudicio tamen iuris alieni. In cuius rei memoriam, perpetuamque firmitatem, presentes concessimus litteras, novi et autentici sigilli nostri munimine roboratas. Datum, per manus discreti viri Andree, prepositi ecclesie Budensis, aule nostre vicecancellarii, dilecti et fidelis nostri. Quinto Idus mensis Decembris, anno Domini Millesimo CCC-o vicesimo quarto, regni autem nostri anno similiter vicesimo quarto. Venerabilibus – – – út in nr. superiori.
Fragmen sigilli e rubro, viridi., flavo et caeruleo serico pendet. – Orig. membr., in Arch. Cap. Poson. Priv. Capsa C. fasc. 5. nr. 51. – Diploma hoc, e rationibus sub nr. 97. propositis pariter Posonii editum fuerit.
99.
1325. Visegrád. 6. Januarii. – Carolus I. rex, immunitatem domus, monasterii sancti Crucis in Austria, Ordin. Cisterc., Posonii existentis, revocat, eamque oneribus civilibus subiicit, aut iusto pretio vendendam ordinat.
Ed. Fejér: Cod. Dipl. VIII/2. p. 610.
[55] 1323. 18. Jun.
Első
