100.
1325. Esztergom. 29. Januarii. – Theophilus prepositus Strigon., detentores bonorum ecclesia s. Andreae apostoli de Posonio, vi mandati papalis, sub excommunicationis poena, ad restitutionem stringi iubet.
Theofilus Strigoniensis ecclesie prepositus, laudabilibus et discretis viris Petro, quondam preposito, canonico suo (sic!), domino Jacobo, et domino Johanni. rectori ecclesie de Gala, canocicis Posoniensibus, dilectis sibi in Christo fratribus et amicis, salutem et mandatis apostolicis humiliter obedire. Noverit vestra discrecio litteras sanctissimi patris Johannis, divina providencia sacrosancte Romane ecclesie sumpmi pontificis, nos recepisse; quarum tenor talis est:
Sequit. bulla Joannis PP. XXII., edit. T. II. p. 730. nr. 819. de anno 1317. 25. Febr.[56]
Sane discretus et honorabilis vir, magister Thomas, eiusdem ecclesie Posoniensis custos, nobis significare curavit: quod Jacobus, civis Posoniensis, quondam iudex, et Martinus presbiter canonicus eiusdem ecclesie Posoniensis, domini nostri regis Hungarie capellanus, – unam vineam in territorio eiusdem loci constitutam, et unum laneum de terra arabili, nec non domos seu fundos, proventuum septem librarum, ad ecclesias beatorum Gothardi et Andree apostoli secundum donacionem Hertiliny, quondam iudicis, et Hambathonis iudicis bone memorie, pertinentes; et per venerabilem patrem dominum Gentilem, tunc in partibus Hungarie legatum, confirmatas, concessas et custodie Posoniensi unitas in perpetuum, et eorum aut earum fructus percipiendos et regendos per custodem eiusdem ecclesie Posoniensis, qui pro tempore fuerit, – occupaverunt et occuptos detinent, iam fere per duos annos, ad suos usus convertendo, contra Deum et iusticiam, indebite et iniuste. Cum igitur nos mandatum apostolicum nobis iniunctum in hac parte, fideliter et humiliter exequi et compellere debeamus; devocioni vestre, tamquam filiis vere obediencie, mandamus sub virtute sancte obediencie predicte, auctoritate apostolica firmiter iniungentes, quatenus statim, receptis presentibus, predictos dominum Jacobum, et Martinum presbiterum, in persona eiusdem domini Jacobi, si presens non fuerit, ammoneatis salubriter et inducatis verbo vestro, ut a die amonicionis ad quindecim dies, vineam, laneum et domos cum fundis, septem talenta annuatim solventibus, restituant memorato custodi, nulla difficultate interposita; et de perceptis fructibus et proventibus usque modo, satisfaciant competenter. Quod si facere non curaverint animo indurato, elapsis ipsis quindecim diebus et terna ammonicione premissa, octavo die eisdem interdicatis ingressum ecclesie et participacione divinorum; si vero transactis octo diebus nichil fecerint, ipsos auctoritate apostolica, cessante appellacione, excommunicetis et excommunicatos denuncietis in eadem ecclesia Posoniensi et in aliis ecclesiis, ubicunque fuerit opportunum, omnibus diebus dominicis et festivis, pulsatis campanis et candelis accensis et extinctis, ab omnibus Christi fidelibus arcius evitandos tam diu, donec de premissis debitam satisfaccionem impendere compellantur et a nobis mereantur beneficium absolucionis obtinere. Datum, Strigonii, tercia feria proxima ante festum Purificacionis beate Virginis, anno Domini M-o CCC-o XXV-o.
Sigillum e zona membranacea pendebat. – E transsumpto capit. Strigon. a. 1351., in Arch. Cap. Poson. Priv. Capsa F. fasc. 1. nr. 12. Edit. Fejér Cod. Dipl. VIII/2. p. 660.

---

[56] 1317. 25. Febr.