51.
1323. Esztergom. 6. Maii. – Boleslaus archiepiscopus Strigoniensis, electionem Johannis prepositi Scepusiensis, habito regis consensu, ratihabet.
Nos Bolezlaus, Dei et apostolica gracia archiepiscopus Strigoniensis, locique eiusdem comes perpetuus, memorie commendantes significamus per presentes, quibus expedit universis; quod discreti viri magister Bogomerius cantor et Beke archidiaconus in ecclesia Scepsiensi, plenum habentes mandatum, cum procuratoriis litteris capituli eiusdem Scepsiensis, ecclesie, nobis, unacum honorabilibus viris dilectis fratribus nostris et in Christo karissimis, domino Th(eophilo) preposito et capitulo ecclesie nostre Strigoniensis assidentibus, vice et nomine predicte ecclesie Scepsiensis coram nobis constituti, decretum eleccionis pro futuri praepositi ipsorum creacione in medium produxerunt, sollempniter proponentes, quod cum ecclesia ipsorum sancti Martini Scepsiensis collegiata, per translacionem honorabilis viri, domini H.(enrici) prepositi, in episcopum Wesprimiensem vacavisset, canonici ipsius ecclesie, qui comode adesse potuerunt, die ad hoc inter se assignato, ad eleccionem celebrandam futuri prepositi, vocatis absentibus, secundum leges canonicas processissent et invocato Spiritus sancti gracia, inter diversos tractatus ipsorum, unanimiter et concorditer, nullo penitus discrepante, in personam honorabilis viri domini Johannis, prepositi Boznensis, vota sua direxissent et ipsum in prepositum elegissent eorumdem; atque clero et populo, qui ad compulsacionem campanarum convenerunt, laudes Domino decantantes, eleccionem de eodem canonice per compromissi formam publicasse ut celebratam. Petentes a nobis, sicut decet ab ipsorum metropolitano, sicut humiliter sic devote, quatenus eleccionem per ipsos de predicto domino Johanne preposito, sufficienti litterature, vita laudabili et ordine dyacono, qui tricesimum annum sue etatis explevit, rite et legitime celebratam, – dignaremur confirmare. Nos igitur, quia divine maiestatis reverencia cordi nostro vehementer insidet, et ad eius nominis cultum mentis nostre acies sedule occupatur, eo quod tanto ante oculos ipsius maioris gracie dona percipere speramus, quanto ecclesiis divinitus (sic!) dedicatis pii pastoris officium laudabilius impertimur: ne predicta ecclesia Scepsiensis in suis iuribus grave dispendium paciatur, et populus sibi subiectus fluctuet morsibus predonum, cum predictis fratribus nostris Iuris Canonici professoribus, diligenti examinacione premissa, ipsam eleccionem, canonice celebratam, habito consensu et beneplacito serenissimi principis, domini Karoli, per eandem regis Hungarie, domini nostri, – paternaliter duximus confirmandam. Datis eidem domino Johanni preposito, in eadem ecclesia Scepsiensi, in spiritualibus et temporalibus plenam amministrandi facultatem. In cuius rei testimonium presentes concessimus sigilli nostri appensione roboratas. Datum Strigonii, in festo beati Johannis ante portam latinam. Anno Domini M-o CCC-o XX-o tercio.
Sigillum cerae rubrae impress. e flavo serico dependet. – Orig. in Arch. Cap. Scepus. Priv. Scrin. 11. fasc. 2. nr. 19.

52.
1323. – Nagyvárad. 5. Junii. – Carolus I. rex, mortuo primogenito suo Carolo, ecclesiis in specie capitulo Posoniensi, bona adempta, ex voto suscepto, restitui mandat.
Karolus, Dei gracia rex Hungarie, fidelibus suis universis, baronibus, comitibus, castellanis, officialibus ac universis nobilibus, specialiter autem magistro

---