Nicolao comiti Posoniensi, aliisque omnibus hominibus, cuiuscumque status seu condicionis existant, quibus presentes ostenduntur, salutem et graciam. Cum nos alme matris ecclesie salutari devocione permoti, novissime diebus istis karissimo primogenito nostro Karolo parvo, vocacione dominica translato, ob nostram et eiusdem filii nostri, necnon progenitorum nostrorum salutem, votum voverimus, omnes possessiones universarum ecclesiarum regni nostri et quelibet iura earumdem restituere, pleno iure. Fidelitati vestre firmissime, auctoritate regia precipimus per presentes, quatenus quicunque vestrum, quascunque possessiones, seu iura ecclesie Posoniensis habent et tenent, statim visis presentibus, omni occasione et dilacione postpositis, eidem ecclesie Posoniensi dimittere libere et restituere plenarie debeatis, aliud, ne fractores voti nostri habeamini, facere non audentes; ut autem votum nostrum huiusmodi efficacius reddere domino valeamus, ad omnes possessiones dicte Posoniensis ecclesie et iura quelibet eiusdem, a quibuslibet ea tenentibus, habentibus et detinentibus in ipsius ecclesie Posoniensis preiudicium et iacturam, auctoritate nostra auferendum, recipiendum et eidem ecclesie reddendum et specialiter ad restituendas possessiones sepedicte ecclesie Zelench et Tyrnie vocatas, in comitatu Posoniensi existentes, hominem nostrum, te magistrum Nicolaum, comitem Posoniensem, presentibus deputamus, mandantes et precipientes tibi regio edicto per presentes, ut prenotatum votum nostrum exequendo, omnes possessiones eiusdem Posoniensis ecclesie, a quibuslibet easdem detinentibus, seu iura, presertim possessiones Zelench et Tyrnie prefatas auferre auctoritate nostra, et ipsi Posoniensi ecclesie restituere debeas pleno iure, occasione, dilacione et contradiccione quorumlibet non obstante. Datum, Waradini, die dominico proximo ante festum beati Barnabe apostoli, anno Domini M CCC vicesimo tercio.
Sigillum tergo fuit appressum. – Orig. membr. in Arch. Capit. Poson. Privat. Capsa C. fasc. 5. nr. 49. – Transsumit a. 1357. 18. Jan. Ludovicus I. rex. – Ibidem Capsa D. fasc. 7. nr. 67.

53.
1323. Pozsony. 18. Junii. – Magistratus Comitatus Posoniensis, capitulo Posoniensi, terras Apka et Kosei restituit.
Nos magister Petrus, curialis comes Posoniensis et Andreas de Churle, Petrus de Guttur, Lepoldus de Paka et Walentinus de Werekne, iudices nobilium, significamus universis, quibus expedit, presencium per tenorem; quod cum nos ad peticionem discretorum virorum, magistri Nicolai prepositi et capituli ecclesie Posoniensis, nobilem virum Nicolaum, filium Eleek, hominem nostrum, et Dominicum, filium Damiani de Beel, iobagionem castri Posoniensis, ad reambulandas et restituendas possessiones dicte ecclesie Posoniensis, in comitatu Posoniensi existentes, si contradictores non apparerent, una cum ipso preposito misissemus; iidem Nicolaus et Dominicus ad nos reversi unanimiter retulerunt, quod duas terras dicte ecclesie Posoniensis, unam videlicet Obka vocatam, que est inter ecclesiam seu villam Sancti Michaelis et inter terram Meerche quondam, et aliam Kusey nominatam, que est inter ecclesiam seu villam Sancti Jacobi et inter villam similiter Kusey vocatam, convocatis omnibus vicinis et commetaneis dictarum terrarum, per metas seu terminos et distincciones antiquas reambulassent et cum nullus apparuisset contradictor seu prohibens, terras ipsas cum

---