367.
1334. Esztergom. 7. Aug. – Csanadinus, archiepiscopus Strigoniensis, Ladislaum episcopum Quinqueecclesiensem et Nicolaum abbatem S. Martini, a desumenda e bonis monialium insulae Budensis decima, dehortatur.
Chanadinus, Dei et apostolica gracia archiepiscopus Strigoniensis, locique eiusdem comes perpetuus, venerabili in Christo patri, domino Ladislao, divina miseracione episcopo Quinqueecclesiensi; item religioso et Deo amabili viro, fratri Nicolao, eadem gracia abbati sancti Martini de sacro monte Pannonnie, amicis suis reverendis, mutuam et sinceram in Domino caritatem. Vestre paternitatis amicicie presencium serie nota fiant: quod sanctissimi in Christo patres, sacro sancte Romane, ac universalis ecclesie sumpmi pontifices, vigore suorum instrumentorum bullatorum, sacre religioni inclusarum dominarum sanctimonialium de insula Budensi, sub cura fratrum predicatorum vivencium, ex speciali apostolice favorabilitatis gracia, inter alias libertates indulserunt, ut ad prestacionem decimarum, de quibuslibet possessionibus et bonis ipsorum, que haberent, vel optinere valerent in futurum, nullatenus tenerentur, nec eciam ad ipsarum soluciones aliquatenus compellerentur. Si qui autem hoc attemptare presumpserent, indignacionem omnipotentis Dei, beatorumque Petri et Pauli apostolorum eius incurrerent, eo facto. Unde, cum nos ex speciali apostolice sedis mandato conservatores ipsius ordinis existamus, et quelibet ipsius ordinis iura alienata et distracta ad ius et proprietatem eiusdem monasterii revocare teneremur; nunc et ipsum apostolicum mandatum et supplicabiles querele prefatarum sanctimonialium de insula Budensi, ut vos videlicet in preiudicium premisse libertatis earum, decimas possessionum et bonorum suorum exigi feceritis, ad exortacionis verba, vestre amicicie porrigenda, nos compellunt. Quamobrem vestre paternitatis amiciciam, de mandato sedis apostolice, amonemus et ortamur, quatenus quaslibet prefatarum dominarum possessiones racione solucionis decimarum, vobis solvendarum, nullatenus molestare aut perturbare et inquietare debeatis. Nam, si secus feceritis, per censuram ecclesiasticam, contra vos iuxta mandatum apostolicum procedemus, ut teneremur. Datum Strigonii, in dominica proxima ante festum beati Laurencii martiris, anno Domini Millesimo tricentesimo tricesimo quarto.
Orig. membr,, in Arch. Reg. Hung. Regnicol. Acta Monial. Budens. fasc. 16. nr. 23. – Cop. Ferd. Knauz.

368.
1334. Esztergom. 23. Aug. – Conventus Cruciferorum Strigon. Georgium, filium Berkes, in negotio alienationis possessionis Szölgyén, procuratorem constituisse testatur.
Nos magister Jacobus, magister cruciferorum domus hospitalis sancti regis Stephani de Strigonio, totusque suus conventus, significamus tenore presencium universis: quod Georgius, filius Berkez, coram nobis personaliter constitutus, in causa permutacionis, vel in quovismodo alienacionis cum quovis homine, cuiusvis status vel condicionis, possessionis Zeulen vocate, [N]icolaum, filium quondam comitis Edeuch, proximum suum, constituit et statuit suum verum et legitimum procuratorem, dans eidem auctoritatem omnia faciendi in predicta possessionis causa, que verus et legitimus procurator facere consuevit; promittens