possessionum, modo premisso venditarum impetitoribus, vel impetere volentibus, liberare et expedire [propriis suis] laboribus et expensis. In cuius rei memoriam, firmitatemque perpetuam, presentes concessimus litteras nostras [privile]giales, sigilli nostri munimine roboratas. Datum per manus discreti viri domini Ladislai, lectoris ecclesie nostre [Strigoni]ensis, feria tercia proxima ante festum penthecostes, anno Domini M-o CCC-o XXX quarto.
Sigillum e rubro serico pendet. – Orig. membr., in Arch. Mus. Nation. Hung. Budapest, in Arch. Fam. b. Balassa. Fasc. A. L. N. 25.

355.
1334. Avignon. 11. Maii. – Johannes PP. XXII., fratrem Vitum, electum Nitriensem, favori archiepiscopi Strigon. commendat.
Johannes, episcopus servus servorum Dei, venerabili fratri .... archiepiscopo Strigoniensi, salutem et apostolicam benedictionem. Ad cumulum tue cedit salutis et fame, si personas ecclesiasticas, presertim pontificali dignitate preditas, divine propitiatione intuitu, oportuni presidii et favoris gratia prosequaris. Nuper siquidem ecclesia Nitriensi vacante pro eo, quod nos venerabilem fratrem nostrum Meskonem Wesprimiensem, tunc Nitriensem episcopum, licet absentem, a vinculo quo ipsi Nitriensi ecclesie, cui tunc preerat, tenebatur, de fratrum nostrorum consilio et apostolice potestatis plenitudine, absolventes, ipsum ad Wesprimiensem ecclesiam, tunc vacantem, duximus transferendum, preficiendo eum illi in episcopum et pastorem. Nos volentes eidem ecclesie Nitriensi, ne dispendia prolixe vacationis incurreret, paterna solicitudine precavere, cum nullus preter nos ea vice de provisione ipsius Nitriensis ecclesie se intromittere posset pro eo, quod nos diu ante huiusmodi vacationem ipsius ecclesie Nitriensis, omnes ecclesias cathedrales tunc vacantes et vacaturas in antea, per translationes per nos tunc factas et imposterum faciendas, de prelatis earum ubilibet constitutis ad alias ecclesias cathedrales tunc vacantes et in antea vacaturas, apud sedem apostolicam vacare intelleximus et voluimus, earumque provisiones dispositioni nostre duximus reservandas, decernentes extunc irritum et inane si secus super hys per quoscunque, quavis auctoritate, scienter vel ignoranter, contingeret attemptari, post deliberationem quam de preficiendo eidem ecclesie Nitriensi personam utilem ac etiam fructuosam, cum eisdem nostris fratribus habuimus diligentem, demum ad dilectum filium Vitum de Castroferreo electum Nitriensem, ordinis fratrum Minorum professorem, in sacerdotio constitutum, cui de litterarum scientia, vite munditia, religionis zelo, honestate morum, spiritualium prudentia et temporalium providentia et aliis virtutum meritis fidedigna testimonia suffragantur, duximus aciem nostre mentis. Quibus omnibus debita meditatione discussis, de persona sua nobis et eisdem fratribus nostris, ob huiusmodi suorum exigentiam meritorum accepta, de dictorum fratrum consilio, eidem Nitriensi ecclesie, auctoritate apostolica, duximus providendum, ipsumque ipsi Nitriensi ecclesie in episcopum prefecimus et pastorem, curam et administrationem ipsius sibi, tam in spiritualibus quam in temporalibus, plenarie committendo; firma spe fiduciaque tenentes, quod dirigente Domino actus suos, eadem Nitriensis ecclesia, per sue circumspectionis