testimonium, presentes eidem magistro Stephano, ad peticionem et instanciam parcium predictarum, duximus concedendas; et dum presentes nobis reportate fuerint, in formam nostri privilegii redigi faciemus. Datum, in dominica Ramispalmarum, anno Domini M-o CCC-o XXX-o quarto.
In tergo; Littera super Cheu. – Et iterum alia manu: Mykowcha, filius Elek, dedit possessionem Chew, Stephano castellano Wyssegradiensi. – Sigillum tergo fuit appressum. – Orig. membr., in Arch. Capit. Strigon. Priv. Lad. 26. fasc. 3. nr. 2.

353.
1334. Avignon. 26. Apr. – Johannes PP. XXII., Mesconem episcopum Nitriensem, ad Vesprimiensem sedem translatum, Chanadino archieppo commendat.
Johannes, episcopus servus servorum Dei, venerabili fratri .... archiepiscopo Strigoniensi, salutem et apostolicam benedictionem. Ad cumulum tue cedit salutis et fame, si personas ecclesiasticas, presertim pontificali dignitate preditas, divine propitiationis intuitu oportuni presidii et favoris gratia prosequaris. Sane pridem ecclesia Wesprimiensis, per obitum bone memorie Henrici, episcopi Wesprimiensis, pastoris solacio destituta, dilecti filii capitulum ipsius ecclesie, vocatis omnibus, qui debuerunt, voluerunt et potuerunt commode interesse, die ad eligendum prefixa, ut moris est, convenientes in unum, venerabilem fratrem nostrum Meschonem Wesprimiensem, tunc Nitriensem episcopum, in Wesprimiensem episcopum, per viam scrutinii concorditer postularunt; ipseque Mescho deinde, huiusmodi postulationi sibi legitime presentate, consentire nequiens, statum suum exposuit humiliter, in hac parte, apostolico beneplacito et mandato. Cumque postmodum prefati capitulum, per certos eorum procuratores ydoneos, propter hoc ad sedem apostolicam specialiter destinatos, a nobis suppliciter petivissent, ut postulationem ipsam, eius nobis presentato decreto, admittere de benignitate apostolica dignaremur. Nos postulationem eandem, quam diligenter examinari et plenam relationem exinde nobis fieri fecimus, ex certis rationabilibus causis non duximus admittendam. Subsequenter, namque paterna diligentia precavere volentes, ne dicta ecclesia ulterioris vacationis incommoda deploraret, et cupientes illius regimini utilem et fructuosam presidere personam, post deliberationem quam cum fratribus nostris super hoc habuimus diligentem, attentis magnis graciarum donis et virtutum dotibus, quibus illarum Dominus personam ipsius Meschonis episcopi, prout ex testimoniis fidedignis accepimus insignivit, et quod ecclesiam Nitriensem, ut asseritur, laudabiliter gubernavit, considerata quoque unicordia voluntatum dictorum capituli, que in postulatione predicta concurrisse noscuntur, demum in dictum Meschonem episcopum duximus aciem nostre mentis intendentes. (sic!) Igitur tam eidem ecclesie Wesprimiensi, quam gregi Dominico eiusdem salubriter, ac utiliter providere (emansit: cupientes), prefatum Meschonem episcopum, a vinculo quo ipsi ecclesie Nitriensi, cui tunc preerat, tenebatur, de fratrum predictorum consilio et apostolice potestatis plenitudine absolventes, ipsum ad dictam ecclesiam Wesprimiensem apostolica auctoritate transtulimus, ipsumque illi prefecimus in episcopum et pastorem, curam et administrationem ipsius ecclesie Wesprimiensis sibi tam in spiritualibus, quam in temporalibus, plenarie committendo, liberamque sibi tribuendo licentiam ad eandem Wesprimiensem ecclesiam transeundi. Firma in Domino