338.
1333. Visegrád. 8. Maii. – Paulus, judex curiae regiae, causam Chanadini archiepiscopi, contra Nicolaum dictum Mese motam, ad novum terminum prorogat.
Nos comes Paulus, iudex curie domini regis, damus pro memoria, quod causam quam venerabilis in Christo pater, dominus Chanadinus archiepiscopus ecclesie Strigoniensis, contra Nicolaum dictum Mese, personaliter astantem, iuxta continenciam priorum litterarum nostrarum, in octavis festi beati Georgii martiris, in relata accione movere habebat coram nobis, ob regium preceptum, ad quindenas residencie presentis exercitus regii, sub priori statu perhemptorie duximus prorogandam. Datum in Wyssegrad, octavo die [ . . . . .] Anno domini M-o CCC-o XXX-o tercio.
Extus: Pro Nicolao dicto Mese, contra dominum Chanadinum archiepiscopum ecclesie Strigoniensis, ad quindenas residencie exercitus regii prorogatorie.
Sigillum margini exteriori fuit appressum. Orig. membr., in Arch. Mus. Nation. Hung. Bpest. Mat. Vet.

339.
1333. (Esztergom). 10. Maii. – Capitulum Strigoniense, Stephanum et Andream, nobiles de Bars, terras suas Bagátfölde, Mocsudfiamihálfölde et Parlag, Gekmino apothecario Caroli regis, perpetuo vendidisse, perhibet.
Nos Theophylus prepositus et capitulum Strigoniensis ecclesie, damus pro memoria, quod Stephanus, filius Ibur et Andreas, filius Herbordi, nobiles de comitatu Borsiensi, pro se et filiis ipsorum, ut dixerunt, coram nobis personaliter constituti, confessi sunt viva voce: quod quasdam terras, seu sessiones Bagatfeulde, Mochwdfiamichalfeulde et Parlagy vocatas, in comitatu Huntensi existentes, cum eorum utilitatibus et pertinenciis universis, de bona eorum voluntate anuissent et dimisissent magistro Gekmyno, apotecario domini nostri regis, in nostri personaliter comparenti presencia, septem marcis grossorum denariorum, Budensis ponderis, plene receptis ab eodem, sibi et per ipsum suis heredibus, heredumque suorum successoribus, iure perpetuo et irrevocabiliter possidendas, tenendas, pariter et habendas. Tria paria privilegiorum, super hysdem terris, seu sessionibus, aut possessionibus confecta, quibus mediantibus ipsas usque modo abuerunt, tenuerunt et possiderunt, videlicet duo privilegia conventus monasterii de Saag, cum alphabetis consignata; item tercium privilegium a nobis olym emanatum; ac duas litteras conventus cruciferorum domus hospitalis sancti regis Stephani de Strigonio, unam videlicet abcisam et cum capite sigilli eiusdem domus hospitalis reclusam, et aliam clausam, super eisdem possessionibus confectas, eidem magistro Gekmyno restituendo. Preterea prefati Stephanus et Andreas se et suos heredes obligarunt, coram nobis, ab omnibus, processu temporum dictum magistrum Gekmynum, nec non ipsius heredes, racione earundem terrarum, seu sessionum, aut possessionum, inquietare et impetere volentibus, expedire propriis laboribus et expensis. Ita tamen, quod idem magister Gekminus, vel heredes sui universa instrumenta sibi reddita et litteras restitutas, per eosdem Stephanum et Andream, coram quovis judice, super expedicione facienda ipsis Stephano et Andree, vel ipsorum heredibus ostendere, vel exhibere tenebuntur tempore oportuno. Item sepedicti Stephanus

---