198.
1287. 2. Jun. - Capitulum Strigon., Ompudinum de Machala terram quatuor aratrorum in Hetény vendidisse testatur.
Vniuersis, presentes litteras inspecturis, Capitulum ecclesie Strigon. salutem in domino sempiternam. Ad vniuersorum noticiam tenore presencium volumus peruenire, Quod Ompudynus de Machala, gener magistri Sixti, bone memorie quondam ecclesie nostre lectoris, nomine suo et vice Stephani, ac Opour filiorum suorum, ad prensenciam nostram accedens, terram quatuor aratrorum, quam ei et suis filijs in terra Heten per ipsum magistrum Sixtum adhuc uiuentem dixit fuisse donatam, nunc urgentibus sue necessitatibus paupertatis, pariter cum eiusdem terre quatuor aratrorum vtilitatibus et pertinencijs vniuersis, pro duabus marcis argenti, decime combustionis, ad plenum receptis, partim comiti Mauricio, officiali venerabilis patris, domini nostri, domini Lodomerij, dei gracia Strigon. archiepiscopi, coram nobis personaliter constituto, et partim comiti Myconi, filio Myconis, genero eiusdem et ipsorum posteritatibus possidendam se confessus et vendidisse et in perpetuum assignasse. Assumpsitque eos et eorum successores tam per se, quam eciam per suos posteritates expedire ab omni questione, pretextu eiusdem tere quatuor aratrorum et vtilitatum suarum vllo umquam tempore emergente et nominatim, ac specialiter a Paulo, genero suo de Heten, suis laboribus et expensis. Preterea in maioris fidei signum et certitudinis argumentum quatuor priuilegia pie memorie Bele regis quarti, super facto terre hereditarie ipsius magistri Sixti de Heten olim confecta, in duobus quorum separacio terre eiusdem magistri Sixti, facta quondam per Zozymam et felicianum, tunc temporis custodes albensis ecclesie, successiue de mandato regis habebatur, et in tercio eorumdem priuilegiorum regalium erat licencia regia specialis, ac in quarto priuilegio ipsius magistri Sixti quantum ad dominam Joannam, sororem suam, relictam Laurencij de Zeleus et filios eorum, nepotes suos, continebatur adoptacio in heredes, ipse Ompudynus prefatis comitibus Mauricio, ac Myconi assignauit et statuit coram nobis, vna cum priuilegio Cruciferorum sancti Regis Stephani de Strigonio, super facto terre octo aratrorum concesso, relinquens friuola et viribus caritura, si que de instrumentis et munimentis terre Heten aliquo ingenio reseruaret. In cuius rei firmitatem et memoriam sempiternam, ad peticionem et instanciam eiusdem Ompudini, presentes nostro sigillo dedimus communitas. Datum per manus discreti viri, magistri Cypriani, ecclesie nostre lectoris, anno domini M°. CC°. LXXXVII. Vto. (sic) Nonas Junij.
A. B. C.
Sigillum e violaceo et viridi serico pendebat Orig. in Arch. Cap. Strig. publ. Capsa 69. fasc. 5. Nr. 16.