Merkulinum Cantorem[368], Marcum presbiterum, Stephanum decanum, Laurencium plebanum de Sancto Georgio, Stephanum presbiterum, Jacobum nunc plebanum de Latina uilla, canonicos ecclesie Sancti Martini de Scepus, nomine suo et procuratorio nomine tocius Capituli, ex una parte; et inter Venerabilem virum Jacobum, prepositum eiusdem ecclesie, super varijs et diuersis questionum articulis, inferius annotatis, vertebatur, ex altera; de nostra permissione et beneplacito per communes arbitros et amicabiles compositores, videlicet venerabiles et discretos viros: Magistrum Andream, doctorem decretorum, prepositum ecclesie nostre Strigon., Cancellarium nostrum, Magistrum Benedictum, doctorem decretorum, prepositum sancti Thome de promontorio Strigon.; Magistrum Seraphinum prepositum sancti Georgij; Magistrum Jacobum de Camarum[369]; Magistrum Emericum, archidiaconum Huntensem[370]; magistrum Gregorium, archidiaconum de Musunio, necnon magistrum Stephanum archidiaconum de Chazma condam clericum domini Regis, predicte partes in talem pacem, vnionem et concordiam se deuenisse, sub certis penis, in litteris nostris memorialibus et patentibus[371] comprehensis, communiter sunt confesse:
Super primo articulo questionis, videlicet de prebenda, ad missam beate virginis ordinata, per predictos discretos viros ordinatum est, quod Jacobus prepositus ecclesie Sancti Martini de Scepus fedricum sacerdotem, cui ipsa prebenda collata fuit, ut Missam beate virginis cantaret, debeat Canonice reuocare, qui si redierit, ad honorem beate virginis celebret Missam suam; Alioquin tali conferatur cum eodem honore (sic), qui et uelit et possit salua sua honestate illud conuenienter adimplere. Redditus medio tempore predicte prebende percepti, scilicet quinque Marce, quas confessus est prepositus se habere et supra predictam quantitatem, ad fidem et suam conscienciam, ad necessitatem et vtilitatem ecclesie cum consilio fratrum suorum dispensabit.
Item super secundo articulo: ne vices et vicarias archidiaconorum suorum committat extraneis personis extra Capitulum; taliter extitit per eosdem diffynitum, quod honestis personis ecclesiasticis, bone vite et clare opinionis, vndecunque uenerint, dum tamen laudabiliter suum officium exsequantur, intra Capitulum et extra Capitulum, dum tamen sine prauitate, libere possit committere huiusmodi spirituales vices suas, temporales uero redditus suos et prouentus locabit, sicut sibi videbitur expedire, plus tamen offerentibus dare possit.
Item de prebenda vnius Canonie, quam dicunt prepositum post suam confirmacionem recepisse et post octo menses contulisse. Ad que prepositus

---

[368] In secundo exemplari scribitur: comitem.

[369] Ibidem additur: Archidiaconum.

[370] Omnes hi Canonici erant Strigon.

[371] Has proh dolor non offendimus.