167.
1284. - Elisabetha Regina, in memoriam coronationis suae terram reginalem Epel, Capitulo Strigon. confert.
Elisabeth, dei gracia Regina Hungarie, Omnibus xpi. fidelibus, tam presentibus, quam futuris, presentes litteras intuentibus, salutem in uero salutari. De singulorum prouisione solliciti, circa matrem sanctam ecclesiam, quam cultu precipuo ueneramur, curam debemus impendere specialem, ut deo famulantes, Regio inducti beneficio, quiete uiuant et placabilem ostiam offerre ualeant coram deo. Proinde ad uniuersorum noticiam, tam presencium, quam futurorum, harum serie uolumus peruenire, Quod cum post Coronacionem nostram in primo introitus nostri in ecclesiam Strigoniensem, ob deuocionem, quam pie mentis affectu gerimus erga sanctum martirem adalbertum, promisissemus nomine offertorio prefate Strigon. ecclesie in decenti possessione benignitate solita prouidere; memores huiusmodi promissionis nostre; attendentes nichilominus, nil tam esse salubre, tamque pium, quamquam (sic) ecclesijs dei et personis, in eisdem Deo iugiter famulantibus, prouisionem facere specialem; hac consideracione inducte, quandam terram nostram Reginalem, cum terra dicte ecclesie Strigon., Epel uocata, mixtim adiacentem, ad duo aratra sufficientem, super qua exercituales populi Reginales residebant, in perpetuam elemosinam nostram, et ob remedium anime serenissimi domini Regis Stephani, clare recordacionis, soceri nostri, eidem ecclesie Strigon., de plenitudine gracie nostre, ex certa sciencia et mera liberalitate, dedimus, donauimus et contulimus, perpetuo pacifice possidendam, ab usu et potestate eorumdem populorum exercitualium pure et simpliciter eximendo. Ut igitur hec nostra donacio robur perpetue firmitatis obtineat, nec ullo unquam tempore ualeat retractari; presentes dedimus litteras, duplicis sigilli nostri munimine roboratas. Datum per manus uenerabilis patris Thome, Episcopi Waciensis, aule nostre Cancellarij et Comitis de Plys, fidelis nostri. Anno domini M°. CC°. Octuagesimo Quarto.
Sig. e serico flavo subtili pendebat. Orig. pulchre scriptum, in Arch. Cap. Strig. priv. Lad. 26. fasc. 1. Nro. 17. - Extr. Katona Hist. Crit. VI. 897. et Fejér Cod. dipl. V. III. 214. - Ed. Cod. Strig. II. 146. et Wenzel Cod. Arp. IX. 393.
168.
1284. - Elisabetha Regina Comiti Mauritio filo Buza de Menchel de genere Vason, quia "a primeuis puericie domini ladislai Illustris Regis Hungarie, consortis nostri carissimi et nostre temporibus in omnibus Regni nostri