143.
1283. 8. Apr. - Capitulum Nitriense Praepositum de Thurócz tertiam partem tributi fluvii Vág ante executionem sententiae Lodomerii Archiepiscopi Strigon., Abbati de Zobor resignasse testatur.
Vniuersis xpi. fidelibus, quibus presentes patuerint, Capitulum Nitriensis ecclesie oraciones in domino. Significamus uobis, quod cum ex litteris uenerabilis patris et domini nostri Lodomerij, dei gracia archiepiscopi Strigon., sentenciabiliter (sic) confectis, nobis constitisset, quod nos in corporalem substanciam, partem uidelicet terciam tributi in portu hinc et inde fluuio Wag, tam in portu, quam in nauigio prepositi de turuch, religiosum uirum, fratrem Jacobum, abbatem de Zobur, a primeuis institucionibus ipsam terciam porcionem de iure contingentem, introducere debuissemus uice eiusdem domini archiepiscopi et auctoritate speciali; religiosus uir, frater Iwanka, dictus prepositus de turuch, a parte una personaliter coram nobis constitutus, cogente ipsum sua consciencia pura et salubri, iudicioque iusto eiusdem domini archiepiscopi supradicti, fratri Jacobo, prelibato abbati de Zobur et per consequens suis successoribus, a parte altera similiter coram nobis personaliter constituto, terciam partem prenotatam modo supradicto confessus est coram nobis uiua uoce resignasse, prout ipsa eadem ecclesia de Zobur temporibus primitiuis, mediantibus suis instrumentis et litteris priuilegialibus, racionabiliter confectis, tenuit et possedit. In cuius rei memoriam pleniorem, perpetuumque robur et munimen, ad instanciam peticionis partis utriusque, presentes concessimus litteras, sigilli nostri munimine roboratas. Datum sexto Idus mensis aprilis, Anno domini M°. CC°. LXXX°. tercio, ecclesie nostre Lectore magistro Bartholomeo existente.
A. B. C.
Sigillum e roseo, viridi et violaceo serico pendebat. Orig. in Arch. Episc. Nitr. J. E. I. fasc. 4. Nr. 5. Aliud par literis in fronte signatum, ibidem Nr. 4.
144.
1283. 29. Apr. - Capitulum Strigon. Tomi I. Nrum. 391. transscribit.
Nos magister Andreas, doctor decretorum, prepositus et Capitulum ecclesie Strigon., significamus vniuersis, quibus expedit, litterarum (presencium) noticiam habituris, quod magister Paulus Decanus, Gyula et Petrus presbiteri, et alter Paulus, canonici ecclesie Dymisiensis, nomine suo et tocius Capituli eiusdem ecclesie, ad nostram (presenciam) accedentes, priuilegium Dyonisij,