528.
1301. 31. Oct. - Nicolaus Legatus Papae "in pleno concilio, de mandato nostro Bude solemniter congregato," ad querelam Abbatis Montis Pannoniae, decimas in Comitatu Simigiensi dependi iubet. - Datum Bude secundo Kal. Nov. Pontificatus a. 7.
Nagy Cod. Andeg. I. 15. - De Concilio hoc nihil constat.
529.
1301. 3. Nov. - Nicolaus Episcopus Ostiensis, Legatus Papae, in causa confirmationis Pauli Praepositi Scepusiensis, per Capitulum electi, omnes adversantes Budam evocari iubet.
Frater Nicolaus, miseratione diuina Ostiensis et Velletrensis Episcopus, apostolice Sedis legatus, Discretis viris Jacobo de villa latina et Martino de villa Mathei Plebium Plebanis, Strigon. diocesis, Salutem in domino sempiternam. Dudum Ecclesia Scipsiensis, Strigon. diocesis, Regimine Prepositi destituta, Capitulum eiusdem Ecclesie Paulum, Prepositum Collocensem, in eorum et ipsius Ecclesie Prepositum elegerunt. Presentato itaque nobis pro parte Capituli predictorum Electionis prefate Decreto, postulatum fuit a nobis ex parte ipsorum, illam cum instantia confirmari. Nos itaque uolentes in confirmatione huiusmodi iustum modum et debitum obseruare; Discretioni uestre auctoritate, qua fungimur, committimus et mandamus, quatenus omnes et singulos, quorum interest, uel sua crediderint interesse, in dicta Ecclesia Scipsiensi ex parte nostra publice et peremptorie citare curetis, vt VIII. die post citationem tuam (sic) si iuridica fuerit; Alioquin sequenti die iuridica Bude compareant legitime coram nobis, Allegaturi, quicquid allegare de Jure uoluerint: quare nequeamus electionem huiusmodi confirmare. Non obstante consuetudine Regni Vngarie, per quam dicitur obseruari, quod nullus, ad Judicium euocatus, teneatur coram Judice, coram quo uocatus existit, nisi post lapsum certi temporis a die sibi assignati termini in Judicio comparere. Diem autem citationis huiusmodi et quicquid inde duxeritis faciendum, nobis fideli scripto, harum seriem continenti, studeatis fideliter intimare. Quod si ambo uos hiis exequendis non potueritis interesse; alter uestrum ea nichilominus exequatur. In cuius rei testimonium presentes litteras mandauimus nostri sigilli appensione muniri. Datum Bude III. Nonas Nouembris, Pontificatus domini Bonifatij pape VIII. Anno Septimo.
Sigillum cerae rubrae e zona membr. pendens inferius exhibemus. Orig. in Arch. Cap. Scepus. priv. non registr.

---