89.
Ca. 1158. - Stephanus, filius Adriani, haeredum carens solatio, regis indultu possessiones Baráthka et Szántó Abbatiae s. Benedicti confert.
Notum sit omnibus hominibus, tam modernis, diuine legi subditis, quam eciam posteris, eorum imitantibus deuocionem, quod Ego Stephanus, filius Adriani, herede carens carnali, post obitum Eusidini, fratris mei et filiorum suorum, piissimi regis Geysse clementiam per Gabrielem Comitem rogaui, quatenus sua clemencia permittente, de meis possessionibus, de iure patrimonij habitis, secundum meum placitum disponerem, quo annuente, monasterio sancti Benedicti de Grana duas possessiones dedi, vnam Bratka, vbi ecclesia sancti martini sita est, cum omnibus pertinencijs suis et octo mansionibus libertinorum cum familijs suis et terram ad V aratra cum fenetis etterra sacerdotis, ac pulsatorum cum proprijs terminis. Item aliam possessionem zamto in vicinato adiacentem cum LXXII mansionibus hospitum et terram ad XL aratra, cum fenetis et alijs pertinencijs suis et locum molendini, super fluuium cumpa, qui transit ipsas possessiones. Huius autem rei disposicio ut stabilis permaneat, nobilissimus rex Geyssa, presencia nobilium suorum, scilicet Apa bani, Folcus comitis, Wolfer comitis, Ders comitis, per notarium barnabam hanc cartam stabiliri et per nicolaum, capelle sue comitem, sigillo suo precepit sigillari. Siquis vero hoc testamentum infringere temptauerit, a deo patre anathematizetur et regalem incurrat iram.
Sig. hucdum ineditum regem corona insignitum, in throno sedentem, dextra Sceptrum, laeva autem pomum cum cruce simplici tenentem exhibet, e perigraphe detrita nisi voces: GEISA DEI supersunt. Orig. magnis sed pallescentibus iam litteris exaratum in Arch. Cap. Strig. priv. Lad. 1. Fasc. 1. Nr 5. - Exhibuimus Cod. Strig. II. 2., tum Magyar Sion II. 34. et hinc Wenzell. c. VI. 91. - Diploma hoc antiquissimum est, quod in originali Archivum Capituli Strig. priv. possidet. - Datum Diplomatis e contextu sic eruitur: Apa, alias Arpa, qua comes „eo tempore - anno nempe 1150. V. Fejér 1. c. II. 130. - apud regem gratiosissimus,” bani dignitate insignitus nonnisi a. 1158. occurrit. (Ib. 155.) Barnabas notarius annis 1148. 1156 - 1158. (Ib. 130. 143 - 145. 153 - 155.) Nicolaus autem qua comes capellae, a. 1148., qua sigillator vero a. 1156. comparent (Ib. 130. 143. 144.) Hinc Diploma nostrum nonnisi annis 1156 - 1158 exarari potuit. Porro diploma hoc clare edicit, Stephanum nostrum, fratrem habuisse Euzidinum, et in villa Bratka ecclesiam s. Martini sitam esse; iam autem sub Nro. 78. vidimus, ecclesiam hanc per Euzidinum hunc constructam, a. 1156. consecratam fuisse. His ergo omnibus combinatis, diploma nostrum a. 1158. editum fuerit.